D’eitil duine aonair le haerlíne chuig ceann scríbe san Eoraip. Cailleadh bagáiste an duine aonair agus é ag tógáil na heitilte fillte. Tar éis dó an tsaincheist a thuairisciú ag an aerfort, fuair sé duillín ‘bagáiste ar iarraidh’ ar a raibh ainm duine aonair eile ach ar a raibh mionsonraí cearta faoin mbagáiste a bhí ar iarraidh.

Chuir an duine aonair a ábhair imní in iúl go pras don aerlíne, agus é ag iarraidh teacht ar réiteach chun a chinntiú go ndéanfaí a bhagáiste a rianú agus a shainaithint i gceart. Beag beann ar iarrachtaí an chustaiméara, áfach, ní raibh an aerlíne in ann an tsaincheist a réiteach go sásúil, agus dhiúltaigh sí ticéad nua a eisiúint chun an t-ainm ceart a léiriú ar an duillín bagáiste. Mar thoradh air sin, chinn an duine aonair an ní a ghéarú a thuilleadh trí ghearán a chomhdú leis  an gCoimisiún.

Mar fhreagra air sin, rinne an Coimisiún idirchaidreamh le hOifigeach Cosanta Sonraí na haerlíne chun an taifeadadh mícheart sonraí pearsanta a phlé. Leag an Coimisiún béim ar a thábhachtaí atá láimhseáil sonraí cruinne agus ar na himpleachtaí a bhíonn ag earráidí sonraí ar eispéiris an chustaiméara. Tríd an idirghabháil sin, d’oibrigh an tOifigeach Cosanta Sonraí go tapa chun an scéal a chur ina cheart, á chinntiú go bhfuair an duine aonair duillín nuashonraithe bagáiste ar a raibh an t-ainm ceart.

Bhí an duillín nuashonraithe sin ríthábhachtach don duine aonair seo toisc gur chuir sé ar a chumas éileamh a chomhdú lena sholáthraí árachais i leith an bhagáiste chaillte. Léirítear sa chás seo an tábhacht a bhaineann le cleachtais éifeachtacha bhainistíochta sonraí, agus is féidir é a úsáid chun a mheabhrú d’eagraíochtaí tús áite a thabhairt do choimeád taifead cruinn agus do sheirbhís fhreagrúil do chustaiméirí, go háirithe i gcora a bhaineann le giuirléidí pearsanta.

Rinne carthanas teagmháil leis an gCoimisiún chun comhairle a iarraidh maidir le fiosrú a fuair sé ó thuismitheoir. Bhí an tuismitheoir ag fiafraí an bhféadfadh sé a iarraidh go léirscriosfaí sonraí pearsanta a linbh. Chuaigh na sonraí a bhí i gceist siar roinnt blianta nuair a bhí an leanbh ina mhionaoiseach. Is aosach é anois, áfach, agus bhí an tuismitheoir, a bhí mar chaomhnóir aige ag an am, ag iarraidh a fháil amach an bhféadfadh sé a iarraidh go fóill go léirscriosfaí na sonraí.

Mhínigh an Coimisiún don charthanas go bhfuil leanbh sainmhínithe faoi alt 29 den Acht um Chosaint Sonraí, 2018, mar dhuine aonair atá faoi bhun 18 mbliana d’aois. Ós rud é go bhfuil an duine aonair os cionn 18 mbliana d’aois anois, meastar gur aosach é. Mar sin, tá cumas dlíthiúil iomlán aige a chearta cosanta sonraí féin a fheidhmiú, lena n-áirítear an ceart chun a iarraidh go léirscriosfaí a  shonraí pearsanta.

Cé nach raibh an tuismitheoir in ann a iarraidh go díreach a thuilleadh go léirscriosfaí na sonraí thar ceann an duine aonair lena mbaineann, shoiléirigh an Coimisiún go bhféadfadh an duine aonair lena mbaineann a roghnú litir údaráis a thabhairt dá thuismitheoir. D’fhéadfaí an rogha sin a chur in iúl don duine aonair lena mbaineann agus dá thuismitheoir araon. Le litir údaráis den sórt sin, cheadófaí don tuismitheoir gníomhú thar a cheann maidir leis an iarraidh léirscriosta sonraí a dhéanamh. Mheabhraigh an Coimisiún don charthanas go bhfuil sé de fhreagracht air a fhíorú agus a chinntiú go bhfuil aon iarraidh den
sórt sin bailí sna himthosca.

Ghabh an carthanas buíochas leis an gCoimisiún as an bhfreagra uaidh, agus dheimhnigh sé go gcomhroinnfeadh sé an fhaisnéis leis an duine aonair a rinne teagmháil leis ar dtús. A bhuí leis an treoir sin, cabhraíodh lena chinntiú go raibh tuiscint shoiléir ann ar chearta an duine aonair agus ar ról an charthanais araon, agus aitheantas á thabhairt an tráth céanna ar na castachtaí a d’fhéadfadh a bheith ag baint le hiarrataí a láimhseáil ó thuismitheoirí le leanaí aosacha.

Tharraing duine aonair fiosrú anuas leis an gCoimisiún maidir leis na cleachtais cumarsáide margaíochta a bhí ar bun ag aerlíne tar éis dó turas a thógáil leis an aerlíne sin. Tháinig an tsaincheist chun cinn nuair a fuair an duine aonair ríomhphost inar iarradh aiseolas ar thuras a thóg sé le déanaí, rud ar mheas sé gur ríomhphost margaíochta é. Rinne an duine aonair teagmháil leis an gCoimisiún á rá nach bhféadfadh sé rogha díliostála a aimsiú sa chumarsáid sin. 

Ar mhaithe leis an tsaincheist a réiteach, bhí ar an duine aonair dul go suíomh Gréasáin na haerlíne chun an rogha díliostála a aimsiú. Dhoiciméadaigh sé an próiseas sin trí sheat scáileáin a thógáil, rud a thug sé don Choimisiún mar cheangaltán. Ina theannta sin, dúirt an duine aonair nach raibh sé cinnte faoi cé acu a chláraigh nó nár chláraigh sé don chumarsáid sin, agus é ag rá go ndéanann sé iarracht gan toiliú le margaíocht neamh-inmhianaithe. D’iarr an duine aonair soiléiriú maidir le cé acu a cheanglaítear nó nach gceanglaítear ar eagraíochtaí nasc díliostála a chur ar áireamh i ríomhphoist nó i suirbhéanna
nach mbaineann go díreach le seirbhís shonrach, amhail eitilt.

Sa fhreagra uaidh don duine aonair, chuir an Coimisiún in iúl gurb é an riail ghinearálta le haghaidh margaíocht dhíreach leictreonach faoi Rialachán 13 de na Rialacháin um Príobháideacht agus Cumarsáid Leictreonach (I.R. Uimh. 336 de 2011) ná gur gá toiliú dearfach a fháil ón bhfaighteoir. Is féidir margaíocht dhíreach a shainmhíniú freisin mar chumarsáidí a bhfuil mar aidhm leo táirge nó seirbhís a chur chun cinn nó an faighteoir a spreagadh fiosruithe breise a dhéanamh. Shoiléirigh an Coimisiún freisin nach margaíocht dhíreach é comhfhreagras a sheoltar chun críocha faisnéise nó aiseolais agus chun na gcríoch sin amháin. Mar sin féin, dá mbeadh inneachar margaíochta sna cumarsáidí sin, d’fhéadfaí iad a aicmiú mar mhargaíocht dhíreach. Sa chás sin, bheadh sé riachtanach rogha díliostála a chur ar áireamh iontu. 

Tar éis an teachtaireacht cumarsáide a athbhreithniú sa chás ar leith seo, thug an Coimisiún faoi deara nach raibh aon inneachar margaíochta ar áireamh inti agus nach raibh an eagraíocht ach ag iarraidh aiseolas a fháil chun feabhas a chur ar an tseirbhís a thairgtear. Dá bhrí sin, chinn an Coimisiún nár mhargaíocht dhíreach ná sárú ar chearta cosanta sonraí í an chumarsáid seo.
 

Le linn athbhreithniú iniúchóireachta inmheánaí a dhéanamh, tháinig eagraíocht san earnáil dheonach ar an eolas gur chuir iarfhostaí ríomhphoist agus ceangaltáin ar aghaidh óna chuntas ríomhphoist oibre chuig a chuntas ríomhphoist príobháideach agus é fostaithe ag an eagraíocht. Bhí sonraí pearsanta sna ríomhphoist sin, lenar áiríodh sonraí sláinte catagóire speisialta faoi Airteagal 9 RGCS a bhain le roinnt daoine aonair soghonta. 

Rinne an Coimisiún caidreamh leis an eagraíocht chun bunchúis an tsáraithe seo a shuí agus chun a fháil amach cé na bearta a bhí i bhfeidhm ag an eagraíocht chun cearta agus saoirsí na n-ábhar sonraí lena mbaineann a chosaint.  Rinne an eagraíocht imscrúdú ansin, agus thug an t-iarfhostaí a fhocal di gur scriosadh na sonraí pearsanta a bhí i gceist, nár comhroinneadh iad riamh le haon tríú páirtithe, agus gur bhain sé úsáid as a chuntas ríomhphoist pearsanta ar mhaithe le caoithiúlacht in imthosca áirithe. 

Chuaigh Oifigeach Cosanta Sonraí na heagraíochta i dteagmháil le Ceann TF na heagraíochta freisin chun a fháil amach an bhféadfaí aon bhearta teicniúla a chur chun feidhme chun laghdú a dhéanamh ar an dóchúlacht go dtarlódh rud den sórt seo arís. Cuireadh na hábhair sonraí uile lena mbaineann ar an eolas faoin ní seo, agus dúradh leo go mbeadh an tOifigeach Cosanta Sonraí ar fáil dóibh chun cabhrú leo dá mbeadh aon fhiosruithe acu. 

Tar éis caidreamh a dhéanamh leis an gCoimisiún, chuir an eagraíocht roinnt réiteach chun feidhme, idir réitigh theicniúla agus réitigh eagraíochtúla, chun a shocrú nach dtiocfadh an tsaincheist seo chun cinn arís. Sheol an eagraíocht feachtas feasachta freisin chun a mheabhrú do gach ball foirne, do gach oibrí deonach agus don Bhord Stiúrthóirí ar fad go bhfuil freagracht orthu sonraí pearsanta a choinneáil sábháilte agus príobháideach agus a chinntiú go gcomhlíontar Beartas Cosanta Sonraí na heagraíochta. 

Rinne duine aonair iarraidh rochtana faoi Airteagal 15 RGCS chuig eagraíocht ar chreid sé go raibh sí ag próiseáil a shonraí pearsanta. Tar éis an iarraidh sin a fháil, chuir an eagraíocht in iúl don duine aonair nárbh ionann í féin agus an rialaitheoir sonraí sa chás seo. Dúirt an eagraíocht leis an duine aonair gur chuir sí an iarraidh ar aghaidh chuig an rialaitheoir sonraí iarbhír i gcomhréir leis na hoibleagáidí atá uirthi faoi Airteagal 28(3)(e) RGCS cuidiú “…leis an rialaitheoir, a mhéid is féidir, trí bhearta iomchuí teicniúla agus eagraíochtúla a bhaineann le comhlíonadh oibleagáid an rialaitheora iarrataí a fhreagairt maidir le feidhmiú chearta an ábhair sonraí”. Ní raibh an duine aonair sásta leis an bhfreagra agus chuir sé gearán faoi bhráid an Choimisiúin.

D’iarr an Coimisiún fianaise dhoiciméadach ar an eagraíocht (an próiseálaí sonraí) lena dtacófaí leis an maíomh uaithi a rá nárbh ionann í féin agus an rialaitheoir sonraí sa chás seo. Sholáthair an eagraíocht don Choimisiún cóip de chomhaontú um chosaint sonraí, rud inar mionsonraíodh go sainráite gurbh ionann an eagraíocht agus an próiseálaí sonraí agus gurbh ionann an páirtí eile agus an rialaitheoir sonraí i ndáil leis na sonraí pearsanta a bhí á bpróiseáil sa chás seo. Leagadh amach go mion sa chomhaontú sin nár phróiseáil an eagraíocht aon sonraí pearsanta ach amháin ar threoir a fháil ón rialaitheoir sonraí. Scrúdaigh an Coimisiún an comhaontú sin, agus dhearbhaigh sé gurbh ionann an eagraíocht ar chuir an duine aonair an iarraidh rochtana faoina bráid agus an próiseálaí sonraí sa chás seo.

Ghlac an Coimisiún leis gurbh ionann an eagraíocht agus an próiseálaí sonraí do na sonraí pearsanta a iarradh sa chás seo agus gur chomhlíon sí a cuid oibleagáidí faoi Airteagal 15 RGCS agus faoi Airteagal 28(3)(e) RGCS araon.

Tharraing duine aonair fiosrú anuas leis an gCoimisiún maidir le rochtain a fháil ar fhaisnéis a bhí ina sheilbh ag garáiste agus inar mionsonraíodh stair feithicle atá faoi úinéireacht an duine aonair anois. Áiríodh leis an bhfaisnéis sin mionsonraí faoi dhamáistí a measúnaíodh, faoi dheisiúcháin a moladh, agus faoi thuairisc innealtóra a rinneadh ag deireadh bliana ar leith. Chuir an duine aonair iarraidh rochtana faoi Airteagal 15 RGCS faoi bhráid an gharáiste chun teacht ar na sonraí uile a bhaineann leis an bhfeithicil. Dhiúltaigh an garáiste don iarraidh. Ós rud é go raibh sé míshásta leis an bhfreagra a fuarthas ón ngaráiste, rinne an duine aonair teagmháil leis an gCoimisiún chun a ábhair imní a chur in iúl. 

Mar fhreagra air sin, rinne an Coimisiún athbhreithniú ar an iarraidh, agus sholáthair sé faisnéis ábhartha, á rá go bhfuil “sonraí pearsanta” sainmhínithe in Airteagal 4(1) RGCS mar aon fhaisnéis a bhaineann le duine nádúrtha sainaitheanta nó in-sainaitheanta. Cé go bhféadfaí a mheas gur sonraí pearsanta é pláta clárúcháin feithicle, níor leis an duine aonair mar dhuine nádúrtha a bhain riocht na feithicle féin sular tháinig sí faoi úinéireacht an duine aonair. Mar thoradh air sin, mheas an Coimisiún nach raibh aon fheidhm ag an dlí cosanta sonraí maidir leis an gcás seo. D’fhág sé sin nár tháinig na hábhair imní a tarraingíodh anuas faoi shainchúram an Choimisiúin.

Fuair an Coimisiún gearán ó dhuine aonair a chuir iarraidh rochtana faoi Airteagal 15 RGCS faoi bhráid a iarfhostóra (eagraíocht sláinte poiblí), a sholáthair seirbhísí Tacaíochta Baile.

Thug an eagraíocht freagra ar an iarraidh rochtana laistigh den tréimhse reachtúil, is é sin mí amháin ón dáta a bhfuarthas an iarraidh. Agus í ag rá go ndearna sí dianiarracht an iarraidh rochtana a chomhlíonadh, chuir an eagraíocht in iúl don duine aonair sa fhreagra sin freisin go mbeadh sí ag iarraidh brath ar roinnt foluithe féideartha faoi Airteagal 15(4) RGCS. Sholáthair an eagraíocht don duine aonair roinnt píosaí sonraí pearsanta ina raibh foluithe.

Foráiltear le hAirteagal 15(4) nár cheart don cheart atá ag duine aonair chun cóip a fháil de shonraí pearsanta atá á bpróiseáil dochar a dhéanamh do na cearta ná na saoirsí atá ag daoine eile.

Chuir an duine aonair gearán faoi bhráid an Choimisiúin i ndáil leis an ábhar imní a bhí aige maidir le spleáchas na heagraíochta ar Airteagal 15(4) RGCS. Thug an duine aonair le fios freisin go raibh imní air nár eisigh an eagraíocht na sonraí pearsanta uile. 

Chuir an Coimisiún in iúl don eagraíocht gur ghá di, sula bhféachfadh sí le brath ar an díolúine sin, cleachtadh cothromúcháin ceart a dhéanamh chun ceart an duine aonair chun rochtain a fháil ar a shonraí pearsanta a chothromú leis an riosca sainaitheanta a d’fhéadfadh a bheith ann don tríú páirtí mar thoradh ar an bhfaisnéis lena mbaineann a nochtadh. Faoi RGCS, ba cheart d’eagraíochtaí dianiarracht a dhéanamh an iarraidh a chomhlíonadh a mhéid is féidir agus,  an tráth céanna, cosaint leordhóthanach a chinntiú do chearta agus saoirsí  daoine eile.

Rinne an Coimisiún caidreamh leis an eagraíocht, agus d’iarr sé uirthi na taifid sonraí pearsanta a ndearna sí athscrúdú orthu a eisiúint chuig an duine aonair. D’iarr an Coimisiún ar an eagraíocht freisin a dheimhniú don duine aonair nach raibh sí ag coimeád siar aon doiciméad eile ina raibh sonraí pearsanta a  bhaineann leis.

Ina dhiaidh sin, sholáthair an eagraíocht don Choimisiún cóip den chomhfhreagras a sheol sí chuig an duine aonair, agus í ag deimhniú go raibh sí tar éis na taifid sonraí pearsanta a eisiúint i bhformáid a bhí folaithe go páirteach. Ba iad sin na sonraí a choimeád sí siar ar dtús. Dheimhnigh an eagraíocht don duine aonair freisin nár shealbhaigh sí aon taifid eile a bhaineann leis. Bhí an duine aonair sásta gur réitíodh na nithe uile ar bhealach dóthanach.

Tar éis na hidirghabhála ón gCoimisiún, dheimhnigh an eagraíocht don Choimisiún go ndearna sí athscrúdú ar na taifid a d’eisigh sí ar dtús i bhformáid a bhí folaithe go hiomlán. Dheimhnigh sí freisin gur eisigh sí codanna de na taifid ansin, agus í ag folú sonraí ar shonraí tríú páirtí iad. 

Fuair an Coimisiún gearán ó dhuine aonair a chuir iarraidh rochtana faoi Airteagal 15 RGCS faoi bhráid cuideachta bainistíochta réadmhaoine. Bhí an duine aonair ag iarraidh rochtain a fháil ar aon sonraí pearsanta ar phróiseáil an eagraíocht faoi. Sa fhreagra uaithi, luaigh an eagraíocht go sainráite don duine aonair nár phróiseáil sí aon sonraí pearsanta i ndáil leis tráth a rinneadh an iarraidh rochtana ná tráth ar bith roimhe sin. 

Le linn na céime measúnaithe, d’fhiafraigh an Coimisiún den duine aonair faoina chaidreamh leis an eagraíocht chun a shuí cé acu a bhí an eagraíocht ina “próiseálaí sonraí” nó ina “rialaitheoir sonraí” sa chás seo. Tar éis athbhreithniú a dhéanamh ar an bhfreagra ón duine aonair agus ar na doiciméid tacaíochta a sholáthair sé, shuigh an Coimisiún gurbh ionann an chuideachta bainistíochta  réadmhaoine agus an “rialaitheoir sonraí” cuí i ndáil leis an ngearán seo.

D’iarr an Coimisiún ar an eagraíocht mionsonraí breise a sholáthar faoi na cuardaigh a rinne sí chun aon sonraí pearsanta a bhaineann leis an duine aonair a shainaithint. Sa fhreagra tosaigh uaithi, luaigh an eagraíocht go ndearna sí cuardach ar a ‘córas’ agus gurbh iad na haon sonraí pearsanta amháin a raibh sí in ann iad a shainaithint ná an iarraidh tosaigh a rinne an duine aonair. Cheistigh an Coimisiún na cuardaigh a rinneadh, agus d’iarr sé fianaise dhoiciméadach ar na hiarrachtaí a rinneadh chun sonraí pearsanta an duine aonair a aimsiú, lenar áiríodh iad sin a rinneadh i rannóga eile den eagraíocht.

Thug an eagraíocht breac-chuntas cuimsitheach ansin ar na cuardaigh a rinneadh, agus sholáthair sí an doiciméadacht tacaíochta ábhartha. Rinne an Coimisiún athbhreithniú ar an gcomhfhreagras sin, agus shainaithin sé ina dhiaidh sin trí thaifead ina raibh sonraí pearsanta an duine aonair (dhá shonrasc
agus iontráil sonraí amháin ar chóras bogearraí), ar nithe iad nár soláthraíodh don duine aonair.

Tar éis tuilleadh caidrimh fhoirmiúil idir an Coimisiún agus an eagraíocht, soláthraíodh don duine aonair na trí dhoiciméad eile ina raibh a shonraí pearsanta.

Fuair an Coimisiún gearán ó dhuine aonair maidir le taifid ina raibh sonraí pearsanta a bheith á gcoimeád siar mar fhreagra ar iarraidh rochtana. Rinne an duine aonair iarraidh rochtana chuig soláthraí seirbhíse airgeadais faoi Airteagal 15 RGCS, tar éis morgáiste an duine aonair a dhíol leis an eagraíocht sin. 

Dúirt an eagraíocht go raibh sonraí pearsanta á gcoimeád siar ón gcustaiméir ar aon dul le halt 60(3)(b) den Acht um Chosaint Sonraí, 2018 (Acht 2018). Luaigh  an eagraíocht “nach ionann doiciméid urrúsúcháin agus sonraí pearsanta  [an ghearánaigh]”. 

Mhínigh an Coimisiún don eagraíocht an sainmhíniú atá ar shonraí pearsanta faoi Airteagal 4(1) RGCS. Mhínigh sé freisin di go dtarlódh sé, dá mbeadh sonraí pearsanta an duine aonair in aon cheann de na doiciméid luaite a bhí á gcoimeád siar, go mbeadh soiléiriú ag teastáil maidir leis an spleáchas ar na srianta a bhí á gcur i bhfeidhm. Fuair an Coimisiún freagra ón eagraíocht á dhearbhú nach raibh aon sonraí pearsanta sna doiciméid urrúsúcháin, agus tagairt bhreise á déanamh aici do “litir freagartha deiridh” a d’eisigh sí chuig an duine aonair. Ina dhiaidh sin, d’iarr an Coimisiún cóip den “litir freagartha deiridh” sin. D’iarr sé freisin liosta de na sonraí pearsanta a líomhnaíodh a bheith fós amuigh agus aon fhaisnéis eile faoi shuíomh aon taifead ina raibh sonraí pearsanta an duine aonair. D’iarr an Coimisiún ar an eagraíocht freisin breac-chuntas sonrach a thabhairt ar gach taifead ina raibh sonraí pearsanta a bhí á gcoimeád siar agus ar an mbunús reachtúil do dhéanamh amhlaidh. 

Luaigh an eagraíocht ar dtús go raibh sí ag brath ar ailt 60(3) agus 60(7) d’Acht 2018 chun gan na doiciméid a eisiúint. D’fhiosraigh an Coimisiún a thuilleadh na srianta a bhí á gcur i bhfeidhm ag an eagraíocht. De bhun an chaidrimh sin, dheimhnigh an eagraíocht don Choimisiún nach mbeadh sí ag brath a thuilleadh ar aon chuid d’alt 60 d’Acht 2018 chun sonraí pearsanta an duine aonair a choimeád siar. I bhfianaise na hidirghabhála ón gCoimisiún, thug an eagraíocht don duine aonair a shonraí pearsanta a  cuireadh srian leo roimhe sin. 

Tar éis na doiciméid sin a eisiúint, chuir an duine aonair in iúl go raibh sonraí pearsanta breise ann, agus d’iarr sé cóipeanna de ráitis mhorgáiste ó bhliain ar leith. D’fhiosraigh an Coimisiún é sin leis an eagraíocht, agus d’eisigh sí na sonraí pearsanta breise chuig an duine aonair ansin. Chinn an Coimisiún gur mhainnigh an eagraíocht freagra a thabhairt ar an iarraidh rochtana laistigh den chreat ama atá sonraithe faoi Airteagal 12(3) RGCS.

Fuair an Coimisiún gearán ó dhuine aonair i ndáil le hiarraidh rochtana a rinneadh chuig soláthraí seirbhíse Idirlín. Dar leis an duine aonair, chuir sé glao ar an gcuideachta maidir leis an bhféidearthacht a bhí ann seirbhísí leathanbhanda a athrú, agus mheas sé go raibh an leibhéal seirbhíse a fuair sé ón ngníomhaire um sheirbhís do chustaiméirí míshásúil. Mar thoradh air sin, rinne sé iarraidh rochtana chun cóip a fháil dá shonraí pearsanta a bhí á bpróiseáil ag  an gcuideachta.   

Sa fhreagra uaithi ar an iarraidh rochtana sin, d’iarr an chuideachta tuilleadh faisnéise ar an duine aonair, lenar áiríodh a uimhir chuntais.  Dúirt an duine aonair leis an gcuideachta nach raibh sé in ann uimhir chuntais a sholáthar, toisc nár chustaiméir é, á rá nach raibh ann ach custaiméir féideartha a bhí ag fiosrú  faoina sheirbhís leathanbhanda a athrú.  Sa fhreagra uaithi, d’inis an chuideachta  don duine aonair nach bhféadfadh sí an iarraidh rochtana a phróiseáil gan aon uimhir chuntais. Rinne an duine aonair gearán leis an gCoimisiún ansin.

Tar éis an gearán a fháil, chuaigh an Coimisiún i dteagmháil leis an soláthraí seirbhíse Idirlín chun a shuí cén fáth nach bhféadfaí an iarraidh rochtana a phróiseáil gan aon uimhir chuntais agus freastal ar an iarraidh rochtana ón  duine aonair. 

Thug an chuideachta freagra pras don Choimisiún, agus í ag glacadh leis nár cheart don ghníomhaire a bhí ag déileáil leis an duine aonair a rá leis nach bhféadfadh an chuideachta an iarraidh rochtana a phróiseáil. Mhínigh sí freisin nár lean an gníomhaire sin an próiseas ceart le haghaidh déileáil le hiarrataí rochtana ó dhaoine nach custaiméirí iad, agus dúirt sí go gcuirfí oiliúint bhreis cosanta sonraí ar an ngníomhaire lena mbaineann. Sholáthair an chuideachta cóip dá shonraí pearsanta don duine aonair freisin. Cé go bhfuair sé cóip dá shonraí pearsanta, dheimhnigh an duine aonair nár réitíodh an ní ach amháin  tar éis idirghabháil ón gCoimisiún.