Rinne an fiosrúchán seo scrúdú ar an mbonn ar a n-aistríonn Meta Platforms Ireland Limited (“Meta Ireland”) sonraí pearsanta ón AE/LEE chuig na Stáit Aontaithe i ndáil le soláthar a sheirbhís Facebook.

Taifeadtar sa chinneadh gur sháraigh Meta Ireland Airteagal 46(1) RGCS nuair a lean sé le sonraí pearsanta a aistriú ón Aontas Eorpach/ón Limistéar Eorpach Eacnamaíoch tar éis thabhairt an bhreithiúnais ó Chúirt Bhreithiúnais an Aontais Eorpaigh sa chás An Coimisinéir Cosanta Sonraí v. Facebook Ireland Limited agus Maximillian Schrems. Cé gur thug Meta Ireland na haistrithe sin in éifeacht ar bhonn na gClásal Conarthach Caighdeánach (“SCCanna”) nuashonraithe ar ghlac an Coimisiún Eorpach iad sa bhliain 2021 i gcomhar le bearta forlíontacha breise ar chuir Meta Ireland iad chun feidhme, chinn an Coimisiún nár tugadh aghaidh leis na socruithe sin ar na rioscaí do chearta bunúsacha agus saoirsí bunúsacha ábhar sonraí ar shainaithin Cúirt Bhreithiúnais an Aontais Eorpaigh iad sa bhreithiúnas uaithi.

Cuireadh tús leis an bhfiosrúchán ar dtús i mí Lúnasa 2020, agus cuireadh stop leis ina dhiaidh sin go dtí an 20 Bealtaine 2021 le hOrdú ó Ard-Chúirt na hÉireann, go dtí go réiteofaí sraith imeachtaí dlíthiúla. Tar éis imscrúdú cuimsitheach a dhéanamh, d’ullmhaigh an Coimisiún dréachtchinneadh dar dáta an 6 Iúil 2022. Rud suntasach, chinn sé na nithe seo a leanas:

1. Bhí na haistrithe sonraí i gceist á ndéanamh de shárú ar Airteagal 46(1) RGCS; agus
2. Sna himthosca sin, ba cheart na haistrithe sonraí a chur ar fionraí.

Faoi nós imeachta comhair a sainordaíodh le RGCS (Airteagal 60), cuireadh an dréachtchinneadh ar ullmhaigh an Coimisiún é faoi bhráid a rialálaithe piaraí san Aontas Eorpach/sa Limistéar Eorpach Eacnamaíoch, a dtugtar na hÚdaráis Mhaoirseachta lena mBaineann (“CSAnna”) orthu freisin.  Bhí cineál na próiseála a bhí á scrúdú ag an bhfiosrúchán den sórt a d’fhág go raibh gach ceann de na hÚdaráis Mhaoirseachta eile de chuid an Aontais Eorpaigh/an Limistéir Eorpaigh Eacnamaíoch gafa leis mar CSAnna chun críche an nós imeachta comhair.

Maidir le neamhchomhlíonadh RGCS ag Meta Ireland agus leis an moladh ón gCoimisiún go ndéanfaí ordú chun na haistrithe sonraí a chur ar fionraí, d’aontaigh na CSAnna leis an gcinneadh ón gCoimisiún.

Rinne líon beag (ceithre cinn) de na 47 CSA agóidí i ndáil leis an gcumhacht cheartaitheach ar mhol an Coimisiún go bhfeidhmeofaí í trí bhíthin an dréachtchinnidh. Laistigh den fhothacar sin CSAnna, bhí na ceithre CSA uile den tuairim gur cheart Meta Ireland a bheith faoi réir fíneáil riaracháin as an sárú a cinneadh a bheith déanta. Bhí dhá cheann de na CSAnna sin den tuairim freisin gur cheart ordú a thabhairt do Meta Ireland dul i mbun gnímh chun aghaidh a thabhairt ar na sonraí pearsanta a aistríodh go neamhdhleathach cheana féin chuig na Stáit Aontaithe, i.e., na sonraí a aistríodh ó mhí Iúil 2020 go dtí an t-am i láthair.

D’easaontaigh an Coimisiún leis sin, rud a bhí ag teacht lena thuairim gurbh amhlaidh, dá bhfeidhmeofaí cumhachtaí ceartaitheacha breise os cionn an ordaithe fionraí bheartaithe, ba mhó é sin ná méid na gcumhachtaí a d’fhéadfaí a thuairisciú a bheith “cuí, comhréireach agus riachtanach” chun aghaidh a thabhairt ar an sárú ar Airteagal 46(1) RGCS.

Ag teacht sna sála ar phróiseas comhairliúcháin neamhfhoirmiúil, tháinig sé chun solais nach rabhthas in ann teacht ar chomhthoil. I gcomhréir lena oibleagáidí faoi RGCS, tharchuir an Coimisiún na hagóidí chuig an mBord Eorpach um Chosaint Sonraí (“EDPB”) lena gcinneadh de bhun shásra réitigh díospóide Airteagal 65.

Ghlac EDPB an cinneadh uaidh an 13 Aibreán 2023.

Na cumhachtaí ceartaitheacha a feidhmíodh:

I gcomhréir lena oibleagáidí an cinneadh críochnaitheach uaidh a ghlacadh “ar bhonn” an chinnidh ó EDPB, taifeadtar sa chinneadh ón gCoimisiún an 12 Bealtaine 2023 feidhmiú na gcumhachtaí ceartaitheacha seo a leanas ag an gCoimisiún:

1. Ordú, a rinneadh de bhun Airteagal 58(2)(j) RGCS, lenar ceanglaíodh ar Meta Ireland aon aistriú sonraí pearsanta sa todhchaí chuig na Stáit Aontaithe a chur ar fionraí laistigh den tréimhse cúig mhí ón dáta ar ar tugadh fógra do Meta Ireland i dtaobh an chinnidh ón gCoimisiún;
2. Fíneáil riaracháin i suim €1.2 billiún (ag teacht leis an gcinneadh ó EDPB gur cheart fíneáil riaracháin a fhorchur chun pionós a ghearradh as an sárú a cinneadh a bheith déanta. Chinn an Coimisiún suim na fíneála a bhí le forchur faoi threoir na measúnuithe agus na gcinntí a bhí ar áireamh sa chinneadh ó EDPB); agus
3. Ordú, a rinneadh de bhun Airteagal 58(2)(d) RGCS, lenar ceanglaíodh ar Meta Ireland a oibríochtaí próiseála a chur i gcomhréir le Caibidil V RGCS, trí dheireadh a chur leis an bpróiseáil neamhdhleathach, lena n-áirítear stóráil, sna Stáit Aontaithe a bhí á déanamh ar shonraí pearsanta úsáideoirí Aontais Eorpaigh/Limistéir Eorpaigh Eacnamaíoch a aistríodh de shárú ar RGCS, laistigh de shé mhí tar éis an dáta ar ar tugadh fógra do Meta Ireland i dtaobh an chinnidh ón gCoimisiún.

Le haghaidh tuilleadh eolais, léigh an cinneadh iomlán i mBéarla: Fiosrúchán ar Meta Platforms Ireland Limited (Facebook Ireland Limited roimhe seo) - Bealtaine 2023 (PDF, 1.477mb).

Thosaigh an Coimisiún um Chosaint Sonraí an Fiosrúchán tar éis roinnt gearán a fháil ó ábhair sonraí a bhí ag iarraidh a shocrú go léirscriosfaí na sonraí pearsanta fúthu a bhí á bpróiseáil i gcláir eaglaise. Scríobh gach duine de na hábhair sonraí sin chuig a bparóiste nó chuig an Ard-Deoise chun a iarraidh go léirscriosfaí a sonraí de bhun Airteagal 17 GDPR.
Áirítear iad seo a leanas leis na príomhfhionnachtana laistigh den Chinneadh:

• Féadfaidh an tArd-Easpag brath go dleathach ar leasanna dlisteanacha faoi Airteagal 6(1)(f) GDPR mar bhunús dlí do phróiseáil a dhéanamh ar shonraí pearsanta ábhar sonraí a thaifeadtar sa Chlár Báistí, fiú amháin i gcás nach mian leis an ábhar sonraí aon bhaint a bheith aige/aici leis an Eaglais Chaitliceach a thuilleadh;
• Faoi réir coimircí, ní dhéanann leasanna, ábhair bhunúsacha ná saoirsí bunúsacha na n-ábhar sonraí sárú ar na leasanna atá ag an Ard-Easpag sna sonraí pearsanta atá sna Cláir Báistí a choinneáil;
• Féadfaidh an tArd-Easpag brath ar an mbunús dlí faoi Airteagal 9(2)(d) GDPR do shonraí catagóire speisialta ábhar sonraí a phróiseáil le linn a saoil; Tá coimircí iomchuí i bhfeidhm ag an Ard-Easpag le haghaidh próiseáil a dhéanamh ar na sonraí pearsanta catagóire speisialta atá sna Cláir Báistí, mar a cheanglaítear faoi Airteagal 9(2)(d) GDPR;
• Féadfaidh ábhair sonraí leas a bhaint as an gceart chun a iarraidh go gceartófaí na sonraí pearsanta atá sna Cláir Báistí, de réir Airteagal 16 GDPR;
• Ní mór don Ard-Easpag na hoibleagáidí atá air faoi Airteagal 12(3) agus Airteagal 12(4) GDPR a chomhlíonadh maidir le freastal ar iarrataí i ndáil le cearta ábhar sonraí faoi Airteagal 15 go hAirteagal 22 GDPR;
• Maidir le hábhair sonraí nach mbraitheann siad gur baill den Eaglais Chaitliceach iad a thuilleadh, níl aon cheart acu chun a shocrú go léirscriosfaí a sonraí pearsanta sna Cláir Báistí faoi na forais atá leagtha amach in Airteagal 17(1)(a)-(f) GDPR;
• I gcás nach mian le hábhar sonraí a bheith ina b(h)all den Eaglais Chaitliceach a thuilleadh, d’fhéadfadh an tArd-Easpag ráiteas forlíontach á rá “Ní mian leis an duine seo go sainaithneofaí mar Chaitliceach Rómhánach é/í a thuilleadh” a chur leis an iontráil sa Chlár Báistí.

Na cumhachtaí ceartaitheacha a feidhmíodh

Ba cheart don Ard-Easpag a chur in iúl go soiléir anois go gcoinneofar go buan na sonraí pearsanta uile a bhailítear agus a thaifeadtar agus a phróiseáiltear ar shlí eile chun na sacraimintí a mhineastráil. Déanfaidh an tArd-Easpag na nithe seo a leanas:

i. Beartas Príobháideachta na hArd-Deoise a nuashonrú chun a shainaithint gurb é an tArd-Easpag an rialaitheoir sonraí le haghaidh próiseáil a dhéanamh ar na sonraí pearsanta agus na sonraí catagóire speisialta a shealbhaítear i ngach Clár Báistí laistigh dá Ard-Deoise;

ii. an bunús dleathach do phróiseáil den sórt sin, agus na tréimhsí coinneála do shonraí pearsanta den sórt sin, a leagan amach sa Bheartas Príobháideachta;

iii. a leagan amach sa Bheartas Príobháideachta go ndéantar aon mhineastráil sacraimintí áirithe ina dhiaidh sin do dhuine aonair – amhail cóineartú, pósadh/neamhniú agus oirniú/dí-eaglaisiú (nó uchtú) a mharcáil ar a t(h)aifead sa Chlár Báistí, agus a mhíniú cén fáth a dtarlaíonn sé sin;

iv. a chinntiú go gcuirfidh na paróistí laistigh den Ard-Deoise an Beartas Príobháideachta ábhartha ar fáil dóibh sin atá ag tabhairt faoi shacraimintí agus go mbeidh an Beartas sin inrochtana acu.

Le haghaidh tuilleadh eolais, léigh an cinneadh iomlán: Fiosrúchán ar phróiseáil Taifead Eaglaise ag Ard-Easpag Bhaile Átha Cliath ('an tArd-Easpag') Feabhra 2023

2023

Cuireadh tús leis an bhfiosrúchán tar éis do Bhanc na hÉireann fógra a thabhairt don Choimisiún um Chosaint Sonraí faoi shraith 10 sárú sonraí a bhaineann leis an aip baincéireachta BOI365. Bhain na fógraí faoi sháruithe sonraí le rochtain neamhúdaraithe a bheith á fáil ag daoine aonair ar chuntais daoine eile tríd an aip BOI365.

Breithníodh cé acu a chomhlíon nó nár chomhlíon Banc na hÉireann Airteagail 5(1)(f) agus 32(1) GDPR agus, go háirithe, cé acu a chuir nó nár chuir Banc na hÉireann bearta iomchuí teicniúla agus eagraíochtúla chun feidhme chun leibhéal riosca a chinntiú a bheadh iomchuí do na rioscaí a bhaineann leis an bpróiseáil sonraí a dhéanann sé tríd an aip BOI365. Tar éis imscrúdú a dhéanamh, cinneadh sa chinneadh gur sháraigh Banc na hÉireann na hoibleagáidí atá air faoi Airteagail 5(1) agus 32(1) GDPR toisc nár leor na bearta teicniúla agus eagraíochtúla a bhí i bhfeidhm ag an am chun slándáil na sonraí próiseála a phróiseáiltear ar an aip BOI365 a chinntiú.

Ba mar a leanas a bhí na cumhachtaí ceartaitheacha a feidhmíodh:

• Leis an gcinneadh, eisíodh iomardú chuig Banc na hÉireann i leith na sáruithe ar Airteagail 5(1)(f) agus 32(1) GDPR.
• Leis an gcinneadh, ordaíodh do Bhanc na hÉireann a chuid próiseála a chur i gcomhréir le hAirteagail 5(1)(f) agus 32(1) GDPR.
• Leis an gcinneadh, forchuireadh fíneáil riaracháin €750,000 ar Bhanc na hÉireann i leith an tsáraithe ar Airteagal 5(1)(f) GDPR.

Le haghaidh tuilleadh eolais, léigh an cinneadh iomlán i mBéarla: Fiosrúchán ar Bank of Ireland 365 - Feabhra 2023 (PDF, 1.8mb).