Fiosrúchán ar Ollscoil Mhá Nuad

(IN-19-9-3)

Dáta an Chinnidh: 22 Samhain 2024

Tagann an cinneadh seo as fiosrúchán dá dheoin féin a thosaigh an Coimisiún um Chosaint Sonraí (an Coimisiún) i mí Iúil 2019. Bhain an fiosrúchán le sárú sonraí pearsanta ar thug Ollscoil Mhá Nuad fógra faoi i mí na Samhna 2018.

Rinne an sárú difear do na cuntais ríomhphoist de chuid fostaithe ollscoile, agus thug sé deis do dhaoine neamhúdaraithe smacht a fháil ar suas le sé chuntas. Bhain na daoine neamhúdaraithe úsáid as an rialú a bhí acu ar chuntas amháin chun rialacha ríomhphoist a chruthú lenar ceileadh teachtaireachtaí a fuarthas ó sheoltaí áirithe. Ar an mbealach sin, rinne na daoine neamhúdaraithe calaois, rud a d’fhág gur fhulaing duine amháin a ndearnadh difear dá c(h)untas ríomhphoist caillteanas airgeadais. Ina dhiaidh sin chúitigh Ollscoil Mhá Nuad an duine sin as an gcaillteanas sin. Rinne an Coimisiún measúnú ar na bearta teicniúla agus eagraíochtúla a bhí i bhfeidhm ag Ollscoil Mhá Nuad chun slándáil na sonraí pearsanta a bhí á bpróiseáil aici a chinntiú, agus scrúdaigh sé a mhéid a chomhlíon an rialaitheoir an oibleagáid atá uirthi fógra a thabhairt go pras faoi aon sáruithe.

Bearta teicniúla agus eagraíochtúla le haghaidh slándála

Chinn an Coimisiún gur baineadh úsáid as an gcóras ríomhphoist ar raon leatha cuspóirí lena ndearnadh difear do scóip ghinearálta na ngníomhaíochtaí a rinneadh in Ollscoil Mhá Nuad, lenar áiríodh acmhainní daonna agus nithe gaolmhara. Ar na cineálacha sonraí pearsanta a próiseáladh bhí faisnéis mhionsonraithe aitheantais, airgeadais agus teagmhála, mar aon le sonraí pearsanta sláinte agus catagóirí íogaire eile sonraí pearsanta. Leis an bpróiseáil, rinneadh difear do na sonraí pearsanta a bhí ag líon mór daoine aonair. Chinn an Coimisiún, mar sin de, gurb ard a bhí na rioscaí a raibh aghaidh le tabhairt orthu i mbearta teicniúla agus eagraíochtúla Ollscoil Mhá Nuad le haghaidh slándála. Cé gur cinneadh san fhiosrúchán ón gCoimisiún gur chuir Ollscoil Mhá Nuad roinnt bearta iomchuí slándála chun feidhme, cinneadh ann freisin gur léir roinnt laigí suntasacha agus roinnt easnaimh shuntasacha:

• Ar na bearta teicniúla a chinn an Coimisiún a bheith neamh-leordhóthanach bhí mainneachtain úsáid a bhaint as fíordheimhniú ilfhachtóra in imthosca iomchuí, easpa rialaithe ar rialacha cumraíochta ríomhphoist agus bearta neamh-leordhóthanacha chun córais a choinneáil nuashonraithe agus chun bogearraí mailíseacha a chosc.
• Ar na bearta eagraíochtúla a cinneadh a bheith neamh-leordhóthanach bhí beartais agus oiliúint foirne maidir le slándáil ríomhphoist agus cosaint sonraí, maidir le maoirseacht ar úsáid ríomhphoist, maidir leis an mbeartas pasfhocal, agus maidir le beartais i ndáil le sáruithe sonraí pearsanta a rialú agus a bhainistiú.

Cinneadh sa chinneadh ón gCoimisiún nár tugadh aghaidh mar is ceart le bearta teicniúla agus eagraíochtúla Ollscoil Mhá Nuad ar na rioscaí a bhain lena próiseáil, agus aird á tabhairt ar chineál na sonraí pearsanta, ar na cuspóirí ar chucu a úsáideadh iad agus ar an líon daoine a ndearnadh difear dóibh. Cé gur ghlac Ollscoil Mhá Nuad bearta ina dhiaidh sin chun easnaimh a sainaithníodh le linn an fhiosrúcháin a leigheas agus gur chúitigh sí le híospartach na calaoise airgeadais, chinn an Coimisiún gur sháraigh Ollscoil Mhá Nuad Airteagal 5(1)(f) agus Airteagal 32 RGCS toisc gur mhainnigh sí slándáil iomchuí a chinntiú do na sonraí pearsanta a bhí á bpróiseáil aici agus toisc gur mhainnigh sí bearta iomchuí teicniúla agus eagraíochtúla a chur chun feidhme chun slándáil den sórt sin a chinntiú.

Fógra pras a thabhairt ar shárú sonraí pearsanta

Le hAirteagal 33 RGCS, ceanglaítear ar rialaitheoirí sonraí fógra a thabhairt dá n-údarás maoirseachta faoi gach sárú sonraí pearsanta ar dóigh dó a bheith ina riosca do chearta agus saoirsí daoine. Ní mór an fógra a thabhairt ‘gan aon mhoill mhíchuí agus, más féidir, tráth nach déanaí ná 72 uair an chloig tar éis dóibh bheith ar an eolas faoin sárú sin’.

Cé go raibh Ollscoil Mhá Nuad ar an eolas ag céim luath faoi na fíorais uile lenar taispeánadh gur tharla sárú sonraí pearsanta a bhí ina riosca do chearta agus saoirsí daoine, aimsíodh san fhiosrúchán ón gCoimisiún nár thug sí tuairisc ar an sárú don Choimisiún ach níos mó ná trí seachtaine ina dhiaidh sin. Ina ionad sin, is amhlaidh, tar éis di an sárú a aimsiú, a choimisiúnaigh Ollscoil Mhá Nuad comhairleoir slándála TF seachtrach chun tuairisc a thabhairt ar an sárú agus ar na himthosca a bhí ag baint leis. Deimhníodh sa tuarascáil gur cheart fógra a thabhairt don Choimisiún faoin sárú, ach ní dhearnadh an beart sin ach ceithre lá tar éis sheachadadh na tuarascála. Luaigh an Coimisiún go n-áirítear leis an gcuspóir arb éard é fógra pras faoi sháruithe a cheangal an t-údarás maoirseachta a chumasú chun gníomhaíocht a mholadh agus a stiúradh chun daoine a chosaint ar na rioscaí suntasacha ar féidir leo a bheith ag baint le sáruithe. Luaigh sé ina dhiaidh sin gur sháraigh Ollscoil Mhá Nuad Airteagal 33(1) RGCS trí mhoill a chur gan ghá ar fhógra a thabhairt faoin sárú.

Bearta ceartaitheacha

Cuireadh san áireamh i gcinntí an Choimisiúin ar bhearta ceartaitheacha na tosca riachtanacha uile, lenar áiríodh na rioscaí a bhí ag baint leis an bpróiseáil, na cineálacha sonraí pearsanta agus an líon daoine a ndearnadh difear dóibh, agus na bearta leigheasacháin a rinne Ollscoil Mhá Nuad. Thug an Coimisiún aird freisin ar alt 141(4) den Acht um Chosaint Sonraí, 2018, rud lena socraítear uasmhéid €1,000,000 le haghaidh fíneálacha riaracháin a fhéadfar a fhorchur ar ‘údaráis phoiblí’, ar catagóir í a fholaíonn comhlachtaí amhail Ollscoil Mhá Nuad.

Ba iad seo na bearta ceartaitheacha a rinne an Coimisiún:

• iomardú d’Ollscoil Mhá Nuad i leith na sáruithe a sainaithníodh,
• fíneáil riaracháin €25,000 i leith an tsáraithe ar Airteagal 5(1)(f) agus Airteagal 32(1) RGCS,
• fíneáil riaracháin €15,000 i leith an tsáraithe ar Airteagal 33(1) RGCS,
• ordú d’Ollscoil Mhá Nuad a próiseáil a chur i gcomhréir le ceanglais slándála RGCS agus tuairisc a thabhairt don Choimisiún ar na bearta arna ndéanamh.

Is féidir an cinneadh iomlán a íoslódáil ag an nasc seo (i mBéarla): Fiosrúchán ar Ollscoil Mhá Nuad Samhain 2024 - (PDF,1.3MB)