Groupon Ireland Operations Limited – Márta 2024
Dáta an Chinnidh: 8 Márta 2024
An 8 Márta 2024, ghlac an Coimisiún um Chosaint Sonraí (an Coimisiún) cinneadh tar éis dó scrúdú a dhéanamh ar ghearán a fuarthas in aghaidh Groupon Ireland Operations Limited (Groupon).
Bhain an gearán le hiarraidh rochtana agus le hiarraidh léirscriosta a rinneadh chuig Groupon. Mar fhreagairt do na hiarrataí, cheangail Groupon ar an ngearánach ar dtús cóip de dhoiciméad aitheantais a sholáthar chun a chéannacht a fhíorú. Dhiúltaigh an gearánach déanamh amhlaidh. Ina dhiaidh sin, d’éascaigh Groupon na hiarrataí ón ngearánach gan aon cheanglas den sórt sin a fhorchur. Tar éis dó a shonraí pearsanta a fháil, áfach, níor dheimhin leis an ngearánach gur scriosadh a shonraí pearsanta uile ina n-iomláine ina dhiaidh sin de réir na hiarrata léirscriosta uaidh.
Ba iad seo a leanas na saincheisteanna a scrúdaíodh sa chinneadh ón gCoimisiún:
- Cé acu a chomhlíon nó nár chomhlíon Groupon na hoibleagáidí ábhartha atá air faoi RGCS nuair a d’iarr sé aitheantas chun céannacht an ghearánaigh a fhíorú chun críocha na n-iarrataí rochtana agus léirscriosta bunaidh.
- Cé acu a thaispeáin nó nár thaispeáin Groupon go cuí gur scriosadh sonraí pearsanta an ghearánaigh ina n-iomláine mar fhreagairt don iarraidh léirscriosta.
Ós rud é gurbh ionann an phróiseáil a bhí i gceist agus próiseáil “trasteorann”, bhí an cinneadh ón gCoimisiún faoi réir an tsásra comhair agus comhsheasmhachta atá leagtha amach in Airteagal 60 RGCS agus, de bhun Airteagal 60(3) RGCS, chuir an Coimisiún an dréachtchinneadh uaidh faoi bhráid na n-údarás maoirseachta lena mbaineann ar mhaithe le tuairim a fháil uathu.
Ós rud é nach bhfuair an Coimisiún aon agóidí ábhartha réasúnaithe in aghaidh an dréachtchinnidh ó na húdaráis mhaoirseachta lena mbaineann laistigh den tréimhse reachtúil, measadh gur aontaigh na húdaráis mhaoirseachta leis an dréachtchinneadh ón gCoimisiún agus tá siad faoi cheangal aige de réir Airteagal 60(6) RGCS.
Ghlac an Coimisiún an cinneadh uaidh i ndáil leis an ngearán seo de réir Airteagal 60(7) RGCS. Maidir le cé acu a thaispeáin nó nár thaispeáin Groupon go cuí gur scriosadh sonraí pearsanta an ghearánaigh ina n-iomláine mar fhreagairt don iarraidh léirscriosta, cinntear sa chinneadh ón gCoimisiún nach raibh aon sárú ann. Maidir le cé acu a chomhlíon nó nár chomhlíon Groupon na hoibleagáidí ábhartha atá air faoi RGCS nuair a d’iarr sé aitheantas chun céannacht an ghearánaigh a fhíorú chun críocha na n-iarrataí rochtana agus léirscriosta bunaidh, taifeadtar sa chinneadh ón gCoimisiún na sáruithe seo a leanas:
- Airteagal 5(1)(c) RGCS
Cinneann an Coimisiún gur sháraigh Groupon Airteagal 5(1)(c) RGCS nuair a cheangail sé ar an ngearánach ar dtús cóip dá aitheantas a sholáthar chun a chéannacht a fhíorú chun críocha na n-iarrataí rochtana agus léirscriosta uaidh, in imthosca inar chosúil nach bhfuarthas ná nár ceanglaíodh aon fhíorú den sórt sin chun cuntas a oscailt ar dtús agus ina raibh modh fíorúcháin nach raibh chomh sonraíbhunaithe céanna ar fáil do Groupon (ba é sin, an fíorú a dhéanamh tríd an seoladh ríomhphoist a bhaineann leis an gcuntas).
- Airteagal 12(2) RGCS
Cinneann an Coimisiún gur sháraigh Groupon Airteagal 12(2) RGCS nuair a d’iarr sé fhaisnéis bhreise ar dtús maidir le céannacht an ghearánaigh tráth a rinne sé na hiarrataí rochtana agus léirscriosta uaidh, in imthosca nár thaispeáin sé iontu go raibh amhras réasúnach ann maidir le céannacht an ghearánaigh a d’fhágfadh go mbeadh gá ann le hAirteagal 12(6) RGCS a chur i bhfeidhm.
- Airteagail 15(1), 15(3) agus 17(1) RGCS
Cinneann an Coimisiún gur sháraigh Groupon Airteagail 15(1), 15(3) agus 17(1) RGCS nuair a mhainnigh sé, gan bunús dleathach, na hiarrataí rochtana agus léirscriosta tosaigh ón ngearánach a chomhlíonadh tráth a rinneadh iad, in imthosca inar cinneadh an iarraidh ó Groupon ar aitheantas fótagrafach (mar réamhriachtanas le freagairt do na hiarrataí rochtana agus léirscriosta tosaigh) a bheith ina sárú ar Airteagal 5(1)(c) RGCS.
- Airteagal 6(1) RGCS
Cinneann an Coimisiún gur sháraigh Groupon Airteagal 6(1) RGCS nuair a lean sé le sonraí pearsanta an ghearánaigh a phróiseáil tar éis an iarraidh léirscriosta tosaigh uaidh a fháil.
Na Cumhachtaí Ceartaitheacha a Feidhmíodh:
I bhfianaise na sáruithe a cinneadh a bheith ann, d’eisigh an Coimisiún iomardú chuig Groupon de bhun Airteagal 58(2)(b) RGCS.
Chun tuilleadh faisnéise a fháil, is féidir leat cóip den chinneadh iomlán a íoslódáil ag an nasc seo (i mBéarla): Groupon Ireland Operations Limited – Márta 2024 (PDF, 599 KB).