Cinneadh maidir le Groupon International Limited

Dáta an Chinnidh: 16 Nollaig 2020

Ag gníomhú dó ina cháil mar phríomhúdarás maoirseachta, chuir an Coimisiún um Chosaint Sonraí tús le scrúdú ar ghearán a fuair Údarás Cosanta Sonraí na Polainne ar dtús. Bhain an gearán le próiseáil trasteorann, ar ina leith a bhí an Coimisiún inniúil chun gníomhú mar phríomhúdarás maoirseachta. Bhain an gearán le ceann amháin de na cleachtais a bhí ar bun ag Groupon tráth an ghearáin, áit ar chuir sé ceanglas ar ábhair sonraí a gcéannacht a fhíorú trí chóip leictreonach a sholáthar de chárta aitheantais náisiúnta. Bhí feidhm ag an gceanglas sin nuair a rinne ábhair sonraí iarrataí áirithe, lenar áiríodh iarrataí ar shonraí pearsanta a léirscriosadh. Ní raibh aon fheidhm ag an gceanglas sin, áfach, nuair a chruthaigh ábhair sonraí cuntas Groupon. Agus an cinneadh á dhéanamh, leanadh an nós imeachta maidir le próiseáil trasteorann atá leagtha amach in Airteagal 60 den Rialachán Ginearálta maidir le Cosaint Sonraí (RGCS). Tharla na nithe seo a leanas le linn an nós imeachta a leanúint: rinne an Coimisiún scrúdú ar an ngearán, lenar áiríodh iarracht a dhéanamh an gearán a réiteach go cairdiúil; scaipeadh Dréachtchinneadh i measc na nÚdarás Maoirseachta lena mBaineann; rinne an Coimisiún breithniú cúramach ar gach agóid ábhartha réasúnaithe a fuarthas; scaipeadh Dréachtchinneadh Athbhreithnithe i measc na nÚdarás Maoirseachta lena mBaineann; glacadh an Cinneadh Deiridh; agus, ar deireadh, bhí Údarás Cosanta Sonraí na Polainne freagrach as an ngearánach a chur ar an eolas faoin gcinneadh.

• Cinneadh gur sháraigh Groupon prionsabal an íoslaghdaithe sonraí faoi Airteagal 5(1)(c) RGCS nuair a chuir sé ceanglas ar an ngearánach a chéannacht a fhíorú trí chóip a chur isteach de dhoiciméad aitheantais náisiúnta in imthosca ina raibh fáil ag Groupon ar réiteach nach raibh chomh sonraíbhunaithe céanna ar cheist an fhíorúcháin céannachta (ba é sin, seoladh ríomhphoist a dheimhniú).
• Cinneadh freisin gur sháraigh Groupon Airteagail 12(2), 17(1)(a) agus 6(1) in imthosca chás an ghearánaigh.
• Ina theannta sin, eisíodh iomardú chuig Groupon i leith na sáruithe.

Chun tuilleadh faisnéise a fháil, is féidir leat cóip den chinneadh iomlán a íoslódáil ag an nasc seo (i mBéarla): Cinneadh maidir le Groupon International Limited - Nollaig 2020 (PDF, 1,227 KB).