Canbhasáil agus Treoir Toghchán – D’Fheachtasóirí

Nuair a théann canbhasálaí ó dhoras go doras agus nótaí á dtógáil d’idirghníomhaíochtaí le vótálaithe ionchasacha (e.g., an dóchúlacht go vótálfaidh siad, a sainrogha pholaitíochta, an méid is féidir áitiú orthu, etc.), is ionann é sin agus próiseáil sonraí pearsanta arb é an páirtí polaitíochta nó an duine aonair atá ag seasamh sa toghchán an rialaitheoir ina leith. I bhfocail eile, ní mór don pháirtí nó don duine aonair a bhfuil an canbhasálaí ag déanamh ionadaíocht dó/di a chinntiú go gcloítear sa ghníomhaíocht sin le ceanglais an dlí cosanta sonraí atá leagtha amach thuas. Is cuma cé acu a dúirt tú go sainráite le d’fhoireann canbhasála aon nótaí a thógáil nó nach ndúirt, cé acu a thugann na daoine a mbuaileann siad leo an fhaisnéis sin go deonach nó nach dtugann, nó fiú cé acu atá rochtain agat féin ar an bhfaisnéis bhailithe nó nach bhfuil. Is é an rud a fhágann gur ní cosanta sonraí é an ghníomhaíocht sin ná go bhfuil do chanbhasálaithe ag déanamh obair a bhfuil bailiú sonraí pearsanta i gceist léi ar iarraidh a fháil uait.

Dá bhrí sin, nuair atá tú ag dul ó dhoras go doras, ní mór duit a chinntiú go bhfuil coimircí cuí i bhfeidhm chun aon sonraí bailithe a thaifeadadh agus a chosaint, lena n-áirítear aon sonraí ina nochtar tuairimí polaitíochta. Má iarrann tú ar thoghthóirí a bhfaisnéis teagmhála (e.g., uimhir theileafóin nó seoladh ríomhphoist) a thabhairt, déan cinnte de go dtoilíonn siad le teagmháil leantach má tá sé beartaithe agat teagmháil leantach a dhéanamh. Ba cheart duit a chur in iúl go soiléir do thoghthóirí freisin nach bhfuil aon oibleagáid orthu aon fhaisnéis a thabhairt duit agus nach bhfuil an fhaisnéis sin á bailiú agat ach amháin i gcás go dtoilíonn siad leis. Ba cheart duit tréimhse choinneála a bheith agat le haghaidh aon fhaisnéise a fhaightear ón gcanbhasáil agus nósanna imeachta a chur chun feidhme le haghaidh sonraí pearsanta a choinneáil ar feadh tréimhse nach faide ná mar is gá.

 Dlíthiúlacht na Próiseála

Faoi mar atá amhlaidh i gcás gach rialaitheora sonraí pearsanta, tá freagracht ar fheachtasóirí a chinntiú gur ‘dleathach’ atá aon úsáid a bhaineann siad as sonraí pearsanta. Maidir le roinnt de na sonraí pearsanta a mbaineann feachtasóirí úsáid astu, d’fhéadfadh siad a bheith ina sonraí dá ngairtear sonraí pearsanta ‘catagóire speisialta’, amhail sonraí ina nochtar tuairimí polaitíochta.

Mar shampla, ceadaítear do pháirtithe polaitíochta agus do dhaoine atá ag seasamh i dtoghchán úsáid a bhaint as faisnéis atá i gClár na dToghthóirí chun cumarsáid a dhéanamh le vótálaithe, chun canbhasáil a dhéanamh, chun bileoga faisnéise a dháileadh agus chun gnáthghníomhaíochtaí toghcháin eile a dhéanamh. Ní chuimsítear aon sonraí catagóire speisialta i gClár na dToghthóirí toisc nach bhfuil ann go bunúsach ach liosta de na daoine atá i dteideal vótáil. Má chomhcheanglaítear faisnéis ón gclár le faisnéis ó fhoinsí eile (e.g., faisnéis maidir le sainroghanna polaitíochta agus leis an dóchúlacht go vótálfaidh duine aonair, etc.) chun bunachar sonraí dílsithe a chruthú, áfach, is dóigh go mbeidh próiseáil sonraí catagóire speisialta sa ghníomhaíocht sin. Is í an difríocht ná gur féidir úsáid a bhaint as an mbunachar sonraí sin anois chun daoine aonair a shainaithint, agus chun spriocdhíriú orthu, ar bhonn a dtuairimí polaitíochta.

Tá cosaintí breise faoi RGCS ag sonraí catagóire speisialta. I gcomhthéacs gníomhaíochtaí toghcháin, fágann sé sin gurb amhlaidh, chun go mbeidh an phróiseáil dleathach, nach mór bunús dlí a bheith aici i gcónaí faoi Airteagal 6 RGCS ach gurb amhlaidh, más ionann í agus próiseáil sonraí catagóire speisialta, nach mór ceann amháin de choinníollacha Airteagal 9(2) RGCS a chomhlíonadh léi freisin. Tá sé de fhreagracht ar an rialaitheoir a chinneadh cén bunús dlí atá ann le hoibríocht próiseála ar leith, agus d’fhéadfadh sé sin a bheith éagsúil ag brath ar an gcomhthéacs, amhail toiliú le margaíocht dhíreach leictreonach nó próiseáil ‘is gá chun cúram a chur i gcrích a dhéantar ar mhaithe le leas an phobail’ i gcás gníomhaíochtaí toghcháin áirithe. I gcás go bhfuiltear ag brath ar thoiliú mar bhunús dlí, ní mór an toiliú a bheith tugtha faoi shaoirse agus ní mór é a bheith sonrach, feasach agus gan athbhrí.

 Trédhearcacht

Má bhailíonn tú faisnéis go díreach ó dhaoine aonair, bíodh sé i bpearsa nó ar shlí eile, nó ó fhoinsí tríú páirtí, bíodh sé i bpearsa nó ar shlí eile, ní mór duit bheith trédhearcach faoin úsáid atá tú ag baint as a sonraí pearsanta (ar aon dul le hAirteagail 13 agus 14 RGCS faoi seach). Ní mór duit faisnéis a thabhairt dóibh faoi na nithe seo: cé thusa agus conas is féidir teagmháil a dhéanamh leat; cén fáth a bhfuil tú ag bailiú a sonraí; cé leis a gcomhroinnfidh tú a sonraí; cá fhad a choinneoidh tú a sonraí; cén bunús dlí atá ann leis an bpróiseáil sin; agus cé na cearta cosanta sonraí atá acu. Is féidir leat, mar shampla, an fhaisnéis sin a thabhairt ar bhonn duine le duine nó bileog faisnéise ina leagtar an fhaisnéis sin amach a thabhairt do dhaoine aonair. Is féidir leat freisin daoine aonair a threorú chuig dóigh eile ar féidir leo an fhaisnéis sin a rochtain go héasca, mar shampla ar do shuíomh Gréasáin. Má dhéanann tú é sin nó má úsáideann tú modh neamhdhíreach eile le haghaidh an fhaisnéis sin a thabhairt, ba cheart duit, ar a laghad, toghthóirí a insint ar dtús faoi cé thusa, faoi conas is féidir teagmháil a dhéanamh leat agus faoi cén fáth a bhfuil a bhfaisnéis á bailiú agat agus a mhíniú go bhfuil cearta acu (lena n-áirítear i ndáil le próiseáil a sonraí).

 Canbhasáil Ar Líne

Má oibríonn tú suíomh Gréasáin, ba cheart duit a chinntiú go gcomhlíonann tú na hoibleagáidí trédhearcachta atá ort trí ráiteas príobháideachta a bheith agat is féidir a rochtain go héasca, atá infheicthe go soiléir agus atá éasca le tuiscint ina dtugtar an fhaisnéis seo a leanas do dhaoine aonair: cé thusa agus conas is féidir teagmháil a dhéanamh leat; cé na sonraí pearsanta atá á mbailiú/á n-úsáid agat agus cén fáth; cén fhoinse a bhfuair tú na sonraí uaithi má fuair tú na sonraí ó fhoinse eile; an bunús dlí leis an bpróiseáil; cé leis a gcomhroinnfidh tú na sonraí; cá fhad a choinneoidh tú na sonraí; agus cé na cearta cosanta sonraí atá acu. Má bhaineann do shuíomh Gréasáin úsáid as fianáin chun sonraí úsáideoirí a bhailiú, ba cheart an méid sin a mhíniú go soiléir air, agus téarmaí na húsáide fianán á mionsonrú agus modh a sholáthar le haghaidh toiliú le fianáin a chur a thabhairt nó a dhiúltú. Má tá sé beartaithe agat gabháil d’fhógraíocht polaitíochta ar líne nó úsáid a bhaint as seirbhísí tríú páirtí le haghaidh gníomhaíochtaí toghcháin, ba cheart duit a chinntiú go bhfuil bunús dlí agat le haon sonraí pearsanta a chomhroinnt leis an tseirbhís tríú páirtí sin nó leis an ardán fógraíochta tríú páirtí sin (go háirithe toisc go bhféadfadh gurbh ionann é sin agus próiseáil sonraí catagóire speisialta de réir Airteagal 9 RGCS). Ní mór eolas a thabhairt do dhaoine aonair freisin faoi aon tríú páirtithe a gcomhroinnfear a sonraí pearsanta leo.

 Margaíocht Dhíreach Leictreonach agus Canbhasáil

Níor cheart duit úsáid a bhaint as na sonraí pearsanta a shealbhaíonn tú ar thoghthóir chun cumarsáidí canbhasála margaíochta dírí leictreonaí (teachtaireachtaí téacs, ríomhphoist, glaonna teileafóin nó facsanna) a sheoladh ach amháin i gcás gur thoiligh an duine roimhe sin le cumarsáidí den sórt sin a fháil. Tá sé tábhachtach go gcoinneofá taifead ar an toiliú toisc gur gá duit a bheith in ann a thaispeáint go raibh toiliú agat lena sonraí pearsanta a úsáid ar an tslí sin. Nuair atá cumarsáid á déanamh agat trí theachtaireacht téacs, trí ríomhphost, ar an bhfón nó trí fhacs, ba cheart a chur in iúl i ngach teachtaireacht go bhfuil sí á seoladh agatsa nó go bhfuil sí á seoladh thar do cheann agus ba cheart rogha diúltaithe atá éasca le húsáid a bheith ar áireamh inti chun gur féidir leis an bhfaighteoir an ceart atá aige/aici gan aon chumarsáidí den chineál sin a fháil uait a thuilleadh a fheidhmiú. Níor cheart duit choíche úsáid a bhaint as faisnéis teagmhála atá faighte agat ó thríú páirtithe chun críocha canbhasála margaíochta dírí leictreonaí. Ní mór duit a chuimhneamh freisin gurb amhlaidh, i gcás go bhfuil tú ag brath ar thoiliú mar bhunús dlí le sonraí pearsanta duine éigin a phróiseáil, nach mór an toiliú sin: a bheith tugtha faoi shaoirse (ní mór rogha a bheith ag an duine aonair dáiríre maidir le toiliú a thabhairt nó gan toiliú a thabhairt); a bheith sonrach (ní mór an toiliú a bheith bainteach le críoch shonrach); a bheith feasach (ní mór go leor faisnéise a bheith tugtha don duine aonair chun rogha fheasach a dhéanamh ar thoiliú a thabhairt nó gan toiliú a thabhairt); agus a bheith gan athbhrí (ní mór an toiliú a bheith soiléir agus a bheith tugtha d’aon ghnó – ní hionann boscaí a bhfuil tic curtha leo cheana féin, tost nó neamhghníomhaíocht agus toiliú).