Fíneáil an Choimisiúin um Chosaint Sonraí ar Tusla An Ghníomhaireacht um Leanaí agus an Teaghlach Dearbhaithe sa Chúirt

Dearbhaíodh cinneadh an Choimisiúin um Chosaint Sonraí fíneáil a ghearradh ar Tusla An Ghníomhaireacht um Leanaí agus an Teaghlach i gCúirt Chuarda Bhaile Átha Cliath inniu. Rinneadh an t-iarratas chun an cinneadh, an fíneáil riaracháin €75,000 a ghearradh, a dhearbhú de bhun Alt 143 den Acht um Chosaint Sonraí 2018. Is é seo an chéad uair a eisíodh fíneáil in Éirinn faoin GDPR i ndiaidh fiosrúchán reachtúil agus is é seo an chéad iarratas faoi Alt 143.

Cuireadh tús leis an bhfiosrúchán maidir le trí shárú ar shonraí pearsanta a chuir Tusla in iúl don DPC. Tharla an trí shárú ar shonraí pearsanta ar fad i gcásanna inar theip ar Tusla sonraí pearsanta a fholú agus iad ag soláthar doiciméid do thríú páirtithe.  Tharla an chéad sárú ar shonraí pearsanta nuair a sholáthair Tusla, de thimpiste, seoladh cúramóra altrama d’athair bheirt leanaí bhí i gcúram.  Tharla an dara sárú ar shonraí pearsanta nuair a sholáthair Tusla, de thimpiste, seoladh an linbh a rinne an gearán do dhuine aonair a raibh mí-úsáid ghnéis ar an leanbh curtha ina leith agus uimhir theileafóin a máthar.  Tharla an tríú sárú ar shonraí pearsanta nuair a sholáthair Tusla, de thimpiste, seoladh agus mionsonraí teagmhála tuismitheoirí altrama do sheanmháthair linbh a bhí faoi chúram chomh maith le seoladh scoil an linbh.

Cinneadh

• De réir an chinnidh, sháraigh Tusla Airteagal 32(1) den GDPR nuair nár cuireadh bearta eagraíochtúla cuí i bhfeidhm chun leibhéal slándála cuí a chinntiú i leith an riosca a chuir a cuid oibríochta próiseála maidir le litreacha cosanta i láthair maidir le doiciméid a chomhroinnt le tríú páirtithe.
• De réir an chinnidh freisin, sháraigh Tusla Airteagal 33(1) de GDPR mar gheall nár chuir sí an tríú sárú in iúl don DPC gan mhoill mhíchuí.

Cumhachtaí Ceartaitheacha

• Forchuir an DPC fíneáil riaracháin €75,000 ar Tusla mar gheall ar sháruithe ar Airteagal 32(1) agus Airteagal 33(1).
• Thug an DPC ordú do Tusla oibríochtaí próiseála a cuid sonraí pearsanta a chur ar bhonn comhlíonta le hAirteagal 32(1) de GDPR trí bhearta eagraíochtúla cuí a chur i bhfeidhm le leibhéal slándála cuí i leith an riosca a chinntiú.
• D'eisigh an DPC iomarduithe maidir le sáruithe Airteagal 32(1) agus Airteagal 33(1) den GDPR do Tusla.