Faoi na Rialacháin um Príobháideacht agus Cumarsáid Leictreonach (I.R. Uimh 336 de 2011), coisctear glaonna margaíochta ar theileafóin phóca mura rud é:

1. Gur chuir an síntiúsóir nó an t-úsáideoir in iúl don ghlaoiteoir go dtoilíonn sé/sí le glaonna den sórt sin a fháil ar a theileafón póca nó a teileafón póca, nó

2. Gur thoiligh an síntiúsóir nó an t-úsáideoir go ginearálta le glaonna margaíochta a fháil agus go dtaifeadtar toiliú den sórt sin le glaonna margaíochta a fháil i mBunachar Sonraí an Eolaire Náisiúnta i ndáil lena uimhir theileafóin póca nó lena huimhir theileafóin póca.

I ndáil le margaíocht dhíreach atá bunaithe ar ríomhphoist agus ar theachtaireachtaí téacs teileafóin póca, is cion é cumarsáidí den sórt sin a sheoladh chuig duine aonair gan toiliú soiléir a fháil uaidh/uaithi roimh ré. I gcás ríomhphoist mhargaíochta dírí agus teachtaireachtaí téacs margaíochta dírí a sheoltar chuig gnólachtaí (ar leithligh ó dhaoine aonair), féadfar teachtaireachtaí den sórt sin a sheoladh go dtí go n-iarrann an gnólacht is faighteoir ar an seoltóir iad a stopadh. Ba chion ansin é aon teachtaireachtaí margaíochta a sheoladh ina dhiaidh sin chuig an ngnólacht lena mbaineann.