Cé Muid Féin

Cad a dhéanaimid

Cosaint Sonraí

Cuireadh coimisiún nua, An Coimisiún um Chosaint Sonraí (DPC), ar bhun ag an Acht um Chosaint Sonraí 2018, a ndearnadh dlí de ar an 25 Bealtaine 2018. Is é an Coimisiún nua an t-údarás maoirseachta náisiúnta neamhspleách in Éirinn a bhfuil an fhreagracht air as seasamh le ceart bunúsach an duine aonair go gcosnaítear a sonraí pearsanta. Tá cumhachtaí, feidhmeanna agus dualgais an DPC bunaithe ar an Acht um Chosaint Sonraí 2018, an Rialachán Ginearálta maidir le Cosaint Sonraí, an Treoir maidir le Forfheidhmiú an Dlí, chomh maith leis na hAchtanna um Chosaint Sonraí 1988 go 2003 a thugann, inter alia, éifeacht do Choinbhinsiún Chomhairle na hEorpa 108.

Trí úsáid a bhaint as a chumhachtaí reachtúla, déanann an Coimisiún um Chosaint Sonraí–

  • scrúdú ar ghearáin a fhaightear ó dhaoine aonair maidir le sáruithe féideartha an dlí cosanta sonraí;
  • fiosrúcháin agus imscrúduithe maidir le sáruithe na reachtaíochta cosanta sonraí agus déanann sé gníomh forfheidhmiúcháin más gá;
  • feasacht i measc daoine den phobal a chur chun cinn maidir leis na cearta atá acu go gcosnaítear a gcuid faisnéise faoin dlí cosanta sonraí;
  • feasacht níos mó agus géilliúlacht leis an reachtaíocht cosanta sonraí a chur chun cinn i measc rialaitheoirí agus próiseálaithe sonraí trí threoir ardchaighdeáin a fhoilsiú agus trí dhul i dteagmháil le heagraíochtaí na hearnála poiblí agus príobháidí ar bhonn réamhghníomhach;
  • tacaíocht a thabhairt chun rioscaí a bhaineann le cosaint sonraí pearsanta a shainaithint, trí chomhairliúcháin le heagraíochtaí, agus cuireann sé treoir maidir le modhanna deachleachtais ar fáil chun na rioscaí sin a mhaolú;
  • obair i gcomhar le húdaráis cosanta sonraí eile (lena n-áirítear comhroinnt faisnéise), agus feidhmíonn sé mar Phríomhúdaráis Mhaoirseachta ag leibhéal an AE d'eagraíochtaí a bhfuil a bpríomhshuíomh AE acu in Éirinn.

Rialáil na hIntleachta Saorga

(2024).

Ainmníonn Ionstraim Reachtúil Uimh. 366/2025 – Rialacháin an Aontais Eorpaigh (Intleacht Shaorga) 2025 (arna leasú) an Coimisiún um Chosaint Sonraí (DPC) mar údarás faireachais margaidh chun críocha áirithe d’Acht an AE um Intleacht Shaorga (2024).

Sa chás seo, tá an DPC ar cheann de 15 údarás náisiúnta inniúil, i gcomhréir leis an gcinneadh a rinne an Rialtas ‘samhail dháilte’ a ghlacadh chun Acht an AE um Intleacht Shaorga (2024) a chur i bhfeidhm. Mar údarás faireachais margaidh, beidh feidhmeanna agus cumhachtaí áirithe ag an DPC,

  • maidir le cleachtais áirithe intleachta saorga atá toirmiscthe de bhun Airteagal 5 d’Acht an AE um Intleacht Shaorga (2024)

  • maidir le córais áirithe intleachta saorga ardriosca de bhun Airteagal 6(2) den Ghníomh um an Intleacht Shaorga ón Aontas Eorpach (2024)

  • mar Chomhlacht faoina dTugtar Fógra le haghaidh córais áirithe intleachta saorga ardriosca de bhun Airteagal 6(2) den Ghníomh um an Intleacht Shaorga ón Aontas Eorpach (2024)

Ar leithligh óna ainmniú mar údarás faireachais margaidh, shainaithin an Rialtas an Coimisiún mar cheann amháin de naoi n-údarás um chearta bunúsacha i mí Dheireadh Fómhair 2024. Tríd an ainmniú sin, tugtar cumhachtaí d’údaráis um chearta bunúsacha faoin nGníomh um an Intleacht Shaorga ón Aontas Eorpach chun a sainordú a chomhlíonadh mar údaráis phoiblí náisiúnta atá freagrach as cearta bunúsacha a chosaint. Is é atá i gceist leis sin i gcás an Choimisiúin ná seasamh leis an gceart bunúsach atá ag an duine aonair go dtabharfaí cosaint dá s(h)onraí pearsanta.

Is féidir tuilleadh faisnéise faoi róil, freagrachtaí agus feidhmeanna na n-údarás faireachais margaidh, agus faoi róil, freagrachtaí agus feidhmeanna na n-údarás um chearta bunúsacha faoin nGníomh um an Intleacht Shaorga ón Aontas Eorpach (2024), a fháil ar shuíomh Gréasáin Oifig IS na hÉireann.